Iratxe Casadori (Bilbo, 1972), Askorako Berrikuntza eta Garapen Jasangarriko Helburuen (GJH) zuzendariari, zaila egiten zaio, une batzuetan, bere eremu pertsonala eta profesionala bereiztea. Bere balio pertsonalak erabat lotuta daude enpresaren printzipioekin, eta eguneroko lanean islatzen den sinergia sortzen dute. Iratxek ia hiru hamarkada eman ditu Askoran, bere bizitzaren alderdi guztietan ikuspegi gizatiarrarekin, eta bere bilakaeraren lekuko eta protagonista izan da. Elkarrizketa honetan, bere esperientziak partekatzen ditu, bere ibilbideari, lan-harremanei eta berak gidatzen dituen proiektu berritzaileen eraginari buruzko hausnarketak, Elikation kasu, eta erakusten du dedikazioa eta lankidetza direla gure ingurunea hobetzeko gakoa.
Ia bizitza erdia daramazu Askorako kide izaten. Enpresa hazten ikusi duzu, garatzen, zu ere aldatu zara, zure funtzioak ere bai… Zein une profesionaletan zaude orain?
Une honetan, etapa berri batean nago, bai pertsonalki, bai profesionalki. Alderdi bakoitzak bestea elikatzen du etengabeko ikaskuntza- eta hazkunde-ziklo batean. Nire bizitza profesionalean ikasten dudana nire bizitza pertsonalean aplikatzen dut, eta alderantziz, eta horrek izugarri aberasten nau. Denbora guztian ikasten ari naizela sentitzen dut. 27 urte daramatzat Askoran, eta zortea izan dut sail guztietatik pasatzeko: administraziotik eta erosketetatik hasi eta pertsonen hautaketa saileraino. Orain hedapen handiagoko fasean nago. Posizio berri bat hartu dut eta, urteetan zehar izan dudan esperientziarekin, oso etapa polita bizitzaren ari naiz enpresan. Eskertzen dut berrikuntza eta sormena sustatzen dituen ingurune batean lan egitea, benetan asko gustatzen zait.
Enpresa barruan duzun karguak jende berria ezagutzera behartzen zaitu, inspirazio-iturri berriak deskubritzera… Nolakoak dira laneko harremanak?
Nire rolean, laneko harremanak oso modu aberasgarrian eta konfiantzan eta elkar ulertzean oinarrituta garatzen dira, egunero Askoran lan egiten dugun pertsona guztiengandik ikasiz. Bidean zehar, ikuspegi eta helburu bera duten harremanak eta loturak sortzen dira. Hori sendotasun handia da. Beste egitasmo eta erakunde batzuekiko harremanetan, elkarreraginean aritzen naizen pertsonengandik ikasten dut, elkarlanean arituz eta lankidetzan gauza berriak sortuz gozatzen dut. Harreman eredu hori oso aberasgarria da eta eragin kutsakorra du. Funtsezkoa da besteak ulertzea eta elkarri nola lagun diezaiokegun ikustea. Azkenaldian asko erabili ohi dut “ekarpenak egitearen” adiera. Ekarpenak egiteko gaude hemen, bai bezeroei, bai komunitateari, bai lankideekin, dela bulegoan, dela zentroetan. Begirada horrek gure proiektu eta balio guztietan gidatzen gaitu, batez ere berrikuntza-proiektuetan, eta hori oso pozgarria da.
Elikation bezalako proiektuak.
Askoran hainbat foro, plataforma eta topaketetan parte hartzen dugu, Gipuzkoako Foru Aldundiaren misioak barne. Bertan ideia asko entzuten ditugu eta gure bezero eta erabiltzaileekin ere informazioa egiaztatzen dugu. Ikasleek elikadurarekin duten harremana aldatu egin dela ikusi dugu, eta horrek Elikation bezalako proiektu baten beharra eragin du. Deskubritzeko beharra. Proiektua koherentzia batetik sortu dugu, entzute batetik. Entzute batetik eta ulermen batetik. Besteen beharrak ezagutu nahi izatetik. Eta ulermen horretan bilatzen ditugu gure espazioak. Izan ere, lehen, elikadura nutrizioan oinarritzen zen batez ere, baina orain alderdi gehiago hartzen ditu, eta Elikation errealitate berri horri erantzuteko sortu da, gazteen elikadura-heziketan zentratuz, etorkizunerako funtsezko alderdia baita. Proiektua ez darama Askorak bakarrik, hezkuntza-zentro eta familiekin konektatu behar dugu, ekosistema-ikuspegi batetik lan eginez.
Zuk, arlo pertsonalean, nola egin diozu aurre erronka honi, espero zenuena bete al da?
Pertsonalki, proiektu honek familien egoera hobeto ulertzeko eta haiengana gehiago hurbiltzeko aukera eman dit. Denak ahalik eta ondoen egiten saiatzen direla ikasi dut, eta hortik eraiki dezakegu taldean. Orain, erronka da pentsatzea nola lagun diezaiekegun familiei bizitza erraztuko dieten elikadura-ohitura osasungarriak hartzen, ikerketaren emaitzen arabera elikadurak dakarren zama kontuan hartuta. Hezkuntza-zentroei ere laguntzen ari gara, elkarrekin nola hobetu dezakegun ikusteko. Bide horri orain ekin badiogu ere, ziurrenik indar handia hartuko duela datozen hilabete eta urteotan. Gure helburua aldaketarako aukerak sortzea da, duela urte asko hasi genuen bidea, eta horrek gure zerbitzuak elikatzea eta profesionalki haztea ahalbidetu digu.
Zein da Askoraren egitekoa orain bertan?
Gure zeregina konektatzea eta dinamizatzea da, rolak modu eraginkorrean hartzea, hezkuntza-zentroak, familiak eta erakunde publikoak konektatzeko gaitasuna dugulako. Sektorean ez dago Askorak bezala jarduten duen beste enpresarik, eta horrek gure eremuan erreferente gisa kokatzen gaitu, lan-eredu bakar, kolaboratibo eta ireki batekin. Proiektu honek berresten du, halaber, gure marka-balioak sendo errotuta daudela gure enpresan.
